الحزن البعيد الهادى
القسم : كتب الشعر والفنون
الكاتب : محمد إبراهيم
لبكرة أنا لسه شايفه طشاش
ولمراتي اللي ماعرفهاش
ولولادي اللي لسه مجوش
وللناس اللي مفتكروش
يعزوني في موتي زمان
لكلمة سيبها بظروفها
وكلمة : لسه بالإمكان
ولإخواتي اللي مهتموش
بفكرة اني بكتب شعر
ولأصحابي اللي حطوا اصفار
ف خانة السعر
يوم ما اتبعت واتودعت
لإيد أمي اللي سندتني
ف يوم ما وقعت
ف تاتا وخطوة خطيتها
لكل إزازة رجيتها
عشان الصودا منها تروح
لقعده فوق سطوح بيتنا
وكات ريحة الريحان بتفوح
لسور المدرسة العالى
عشان علمنى اعدى السور
لفكرة انى مش بعرف
اعيش زى البشر ف النور
لسنى اللى نسى يتعد
لدمعة فرحة نازلة بجد
لذكرى بنت حبيتها
مجاش فيه بنت مطرحها
لضحكة حزن فى فرحها
وانا واقف مع المعازيم
لنصى الأبيض اللى الوقت
مسابش ف وشه جزء سليم
لصوت فيروز نجاة وحليم
لكل الماضى والأشواق
لكل اللى انتهى فجأه
وكل اللى ابتدى صدفه
لكل نهايه مش هادفه
وكل حكايه مش بتطول
انا حابب بإنى أقول
مفيش فى الدنيا شيء ثابت
مفيش ولا حاجه على حالها
مفيش فى الدنيا إيد سابت
حاجات إلا اما جه بدالها !!!
اقرأ أيضا في كتب الشعر والفنون
اقرأ أيضا لـمحمد إبراهيم
يمكن ان يعجبك
-
شباب بلا مشاكل
كتاب شباب بلا مشاكل لأكرم رضايعتمد الكاتب في كتابه هذا على منهج معين المنهج الذى
-
صباح الثلاثاء
يضم الديوان خمسون قصيدة وجاءت تحت عناوين متنوعة نذكر منها: “حرير الثلاثاء” في روما… عهد
-
نسيان com
فى النهاية ، ما النسيان سوى قلب صفحتة من كتاب العمر . قد يبدو الأمر
-
بلاغ الرسالة القرآنية
إن القرآن العظيم تصميم رباني راقٍ لبناء فخم ما كلف الإنسان إلا بإنجازه على شموليته
جميع الحقوق محفوظة © 2021
